Dünya 17:46 12.01.2024

Şarl Mişel liderlərini necə qəzəbləndirib?

Avropalı diplomatlar və rəsmilər Avropa İttifaqı Şurasının rəhbəri Şarl Mişelin Avropa Parlamentinə namizəd kimi irəli sürülməsi və müvafiq olaraq hazırkı vəzifəsindən getməsi qərarını pisləyir.

Qaynarinfo xəbər verir ki, bu barədə "Politico” yazıb.

"Bu, tamamilə qalmaqallı bir hərəkətdir", - Avropa siyasi mərkəzinin nümayənfəsi Endryu Daff bildirib.

Nəşr yazır ki, Avropa öz qapısında iki böyük müharibəni seyr edərkən və mübarizə apararkən, Mişelin Aİ təsisatlarında ən mühüm postlardan birini tərk etməsi 48 yaşlı belçikalının indiki rolundan daha çox gələcək perspektivləri ilə maraqlandığına işarə kimi qəbul edilir.

Bundan başqa, onun gedişi həm də növbəti liderlik vəzifəsi üçün təşviş dolu mübarizəyə yol açacaq, belə ki, Macarıstan bu ilin sonunda rotasiya qaydasında Aİ Şurasına sədrlik edəcək, yəni görüşlərə Mişelin yoxluğunda avroskeptik, rusiyayönlü Baş nazir Viktor Orban rəhbərlik edəcək.

Altı diplomat və üç Aİ rəsmisinin sözlərinə görə, onun bu həftəki açıqlaması maraqlar toqquşması yarada bilər, çünki Mişel bir vəzifəyə namizədliyini irəli sürərkən digər vəzifələri icra edəcək. Nəticədə, diplomatlar və siyasətçilər sual edirlər ki, yaxşı olmazmı ki, o, iyunda keçiriləcək Avropa seçkilərindən dərhal sonra, və ya daha tez getsin?

"Məsələ ondadır ki, Avropa İttifaqı Şurası çətin ki, özünü ələ keçirməyə imkan versin... Bu, tamamilə qeyri-səmimi və Avropa İttifaqı Şurasının roluna hörmətsizlikdir”, - Aİ diplomatlarından biri bildirib.

Mişelə yaxın bir məmur Aİ liderləri üçün bu qərarın təəccüblü olmadığını və onların ən qısa zamanda məlumatlandırıldıqlarını bildirib.

"Biz sızmaların qarşısını almaq üçün liderləri vaxtında məlumatlandırmışıq. Bəzi liderlər birbaşa, digərləri dolayısı ilə məlumatlandırılıblar", o, Mişelin ofisinin Aİ məsələlərində liderlərlə çiyin-çiyinə işləyən məmurlara göndərdiyi e-poçta istinad edərək bildirib.

Aİ diplomatı bildirib ki, "üzv dövlətlər Mişelin qərarı barədə əvvəlcədən məlumatlandırılmayıb”.

Xatırladaq ki, Şarl Mişel bildirib ki, o, Avropa Parlamentinə namizədliyini irəli sürmək niyyətində olduğu üçün Avropa İttifaqı Şurasının prezidenti vəzifəsini vaxtından əvvəl tərk edə bilər.

Nizami Bağırov