Yuxunun azlığı ilə yanaşı, həddindən artıq uzun yuxu da orqanizmin bioloji qocalmasının sürətlənməsi ilə əlaqəli ola bilər. Kolumbiya Universitetinin tədqiqatçıları yuxunun müddəti ilə orqanizmin bioloji yaşı arasındakı əlaqəni araşdıraraq bu nəticəyə gəliblər. Araşdırmada təxminən 500 min insanın məlumatları təhlil edilib. Alimlər yuxu müddətinin orqanizmin müxtəlif orqan və sistemlərinin bioloji yaşı ilə əlaqəsini öyrəniblər.
Qaynarinfo "Wydarzenia"ya istinadən xəbər verir ki, nəticələrə görə, bioloji qocalmanın ən aşağı tempi sutkada təxminən 6,4–7,8 saat yatan insanlarda qeydə alınıb.
Eyni zamanda, altı saatdan az və səkkiz saatdan çox yatan insanlarda sürətlənmiş qocalma daha çox müşahidə olunub.
Tədqiqatçılar yalnız beynin vəziyyətini deyil, 17 orqan və sistemi, o cümlədən ürək, ağciyərlər və immun sistemini də nəzərdən keçiriblər.
Yuxusuzluq bir sıra xəstəliklərlə əlaqələndirilib
Alimlər həmçinin qısa yuxu müddəti ilə bir sıra sağlamlıq problemləri arasında əlaqə aşkarlayıblar. Sutkada altı saatdan az yatmaq depressiya, təşviş pozuntuları, piylənmə, 2-ci tip diabet, yüksək arterial təzyiq, ürəyin işemik xəstəliyi və ürək ritminin pozulması hallarının daha çox olması ilə əlaqələndirilib.
Həm qısa, həm də həddindən artıq uzun yuxu bəzi ağciyər və həzm sistemi xəstəlikləri, o cümlədən astma, xroniki obstruktiv ağciyər xəstəliyi, qastrit və qastroezofageal reflüks xəstəliyi ilə əlaqəli olub.
Alimlər mühüm məqama diqqət çəkiblər
Tədqiqat müəlliflərinin fikrincə, yuxu müddəti eyni vaxtda bir çox orqan və sistemin sağlamlığı ilə əlaqəli olduğundan, orqanizmin ümumi vəziyyətinin mühüm göstəricisi ola bilər.
Beləliklə, araşdırmanın nəticələri böyüklər üçün yalnız yuxusuzluqdan qaçmağın deyil, həm də orqanizmin fərdi ehtiyaclarını nəzərə alaraq sabit və kifayət qədər yuxu müddətini qorumağın vacib olduğunu göstərir.
Yuxu ilə bağlı digər məlumatlar
Mütəxəssislər daha əvvəl böyüklərin əslində nə qədər yatmalı olduğunu araşdırıblar. Onlar "hamı mütləq səkkiz saat yatmalıdır" kimi universal qaydanın olmadığını bildiriblər.
Yuxu üzrə ekspertlər həmçinin səhərlər gümrah oyanmaq üçün yatmaq vaxtına diqqət yetirməyi tövsiyə edirlər. Onların sözlərinə görə, sağlam rejim bir gecə beş saat, digər gecə isə 10 saat yatmaq deyil. Hər gecə təxminən eyni müddətdə yatmaq daha məqsədəuyğundur.
Aydın
Şərhlər