Bazar ertəsi, yanvarın 29-da Şimali Atlantika Alyansının (NATO) baş katibi Yens Stoltenberq ABŞ-a səfərə gəlib. Orada o, Co Bayden administrasiyasının nümayəndələri, konqresmenlər və keçmiş prezident Donald Trampın tərəfdarları ilə Ukraynaya 60 milyard dollarlıq yardım paketinin təsdiqi üçün lobbiçilik etməyi planlaşdırır.

Bu barədə Qaynarinfo "Politico”ya istinadən xəbər verir.

Çərşənbə axşamı, yanvarın 30-da NATO-nun baş katibi Konqresə səfər edəcək və burada Nümayəndələr Palatasının spikeri Mayk Conson, Nümayəndələr palatasında demokratların lideri Hakim Cefris, Senatda respublikaçıların lideri Mitç Makkonnel və hər iki partiyanın digər nümayəndələri ilə görüşəcək.

Nəşr qeyd edir ki, çərşənbə günü, yanvarın 31-də Alyansın rəhbəri Trampla yaxından əlaqəli olan mühafizəkar beyin mərkəzi "The Heritage Foundation”da çıxış edəcək.

"The Heritage Foundation”da Stoltenberq ABŞ-ın diqqətini Hind-Sakit Okean regionuna yönəltdiyi halda, Avropanın Ukraynaya dəstək verilməsində liderliyi ələ almasını müdafiə edən skeptik auditoriya ilə qarşılaşa bilər”, - materialda deyilir.

Bu həftənin sonunda Stoltenberq "Lockheed Martin”in Alabamadakı raket zavoduna gedəcək və burada o, çox güman ki, prezident Co Baydenin ABŞ-ın müdafiə işlərinin birbaşa ABŞ-ın Kiyevə yardımından asılı olması ilə bağlı arqumentini təkrarlayacaq.

"Bu mesajlar Respublikaçılar Partiyasının təcridçi qanadına və Baydenin bir neçə aydır Ukraynaya yardım istəməsini müzakirə edən qanunvericilərə yönəldiləcək. Ukraynada vəziyyət çətin olaraq qalır, çünki hazırda Kiyev və Moskva, görünür, özlərini dalana salıb və hər iki tərəf bu məsələdə əhəmiyyətli irəliləyişlərə nail olmaq üçün kifayət qədər döyüş gücü toplaya bilmir”, – Politico yazır.

NATO-nun hərbi rəsmilərindən biri anonim olaraq nəşrə bildirib ki, Alyans cəbhə xəttində ciddi dəyişikliklər gözləmir.

"Biz hamımız razılaşırıq ki, Ukraynanın əks-hücum əməliyyatı gözlənilən nəticələri vermədi. Lakin bu, Rusiyanın təbliğatına baxmayaraq, Rusiyanın qalib gəldiyi anlamına gəlmir. Bu mərhələdəki müharibə Amerikanın liderliyinin nümayişi ilə əlaqəli "uzunmüddətli" müharibədir, hansını ki, biz hamımız dəstəkləyir və təşviq edirik”, - deyə rəsmi bildirib.

Bununla yanaşı, Stoltenberq bəzi mühüm irəliləyişləri qeyd edib. Xüsusilə, Alyansın baş katibi NATO ölkələrinin müdafiə istehsalını necə artırması və Kiyevin öz silahlarını istehsal etmək qabiliyyətini bərpa etməyə başlamaq üçün Ukrayna silah istehsalçıları ilə razılıq əldə etməyə çalışması barədə danışmağı planlaşdırır.

Xatırladaq ki, bazar ertəsi, yanvarın 29-da Yens Stoltenberq ABŞ-ın müdafiə naziri Lloyd Ostinlə görüşüb. Tərəflər Ukraynaya yardımı, xüsusilə də müdafiə istehsalının sürətlə artırılmasının vacibliyini müzakirə ediblər.

Bu günlərdə Alyansın baş katibi bildirib ki, NATO və Aİ müttəfiqləri Rusiyanın Ukraynaya müdaxiləsinin ikinci ildönümünə qədər fəallaşmalı və Kiyevə daha çox yardım göstərməlidir.

Nizami Bağırov