Bakı şəhəri, Xəzər rayonu, Zirə qəsəbəsində yerləşən "Xəmsə" Məhdud Məhsuliyətli Cəmiyətində (MMC) fəhlə oğurluq etdiyi üçün həbs olunub.
Qaynarinfo-nun məlumatına görə, 1995-ci il təvəllüdlü Heydər Həsənovun (soyad şərti) Cinayət Məcəlləsinin 177.2.3-cü maddəsi ilə təqsirləndirilməsinə dair cinayət işinə məhkəmədə baxılıb.
Məlum olub ki, Heydər fəhlə kimi çalışdığı "Xəmsə" MMC-nin Zirə qəsəbəsində yerləşən toyuq fermasında qaynaqçı işləyən Ağakərim adlı şəxsin "iPhone 15 Pro Black" markalı, 128 GB yaddaşa malik telefonunu oğurlayıb.
MMC-yə məxsus istixananın ərazisində fəhlələrin dincəlməsi və evi uzaqda olanların gecələməsi üçün tikilmiş binanın 2-ci mərtəbəsində yerləşən yataq otağına plastik materialdan olan qapının kilidini sındırmaqla daxil olub və çarpayının yanında qoyulmuş tumbanın üstündəki Ağakərimə məxsus telefonu götürüb.
Məlum olub ki, zərərçəkmiş şəxs 2025-ci ilin aprel ayının 14-də mağazadan oğlu Sübhanın adına 2 549 manat 98 qəpiyə "iPhone 15 Pro Black" markalı mobil telefonu alıb və hadisə gününədək istifadə edib.
Məhkəmənin hökmü ilə Heydərə 2 il 9 ay müddətinə azadlıqdan məhrum etmə cəzası təyin olunub. O, cəzasını ciddi rejimli cəzaçəkmə müəssisəsində çəkəcək.
Aydın
