ABŞ Prezidenti Donald Trampın çıxışları ilə bağlı mərc etmək üçün xidməti məlumatlardan istifadə edən keçmiş Ağ Ev teleprompter operatoruna 172 min dollardan çox pul ödəmək tapşırılıb.

Qaynarinfo xəbər verir ki, Qabriel Peres 2025-ci ilin dekabrından 2026-cı ilin fevralına qədər ABŞ prezidentinin çıxışları zamanı hansı sözləri işlədəcəyi ilə bağlı “Kalşi” (Kalshi) proqnoz bazarında əməliyyatlar aparıb. Bu platformada istifadəçilər real dünyada baş verəcək hadisələrə dair proqnozlara mərc edə bilirlər.

Platformanın tənzimləyicisi olan ABŞ Əmtəə Fyuçersləri Ticarət Komissiyası (CFTC) bildirib ki, Peres 107 539,02 dollar məbləğində qazancı təhvil verməli, həmçinin 65 min dollar mülki cərimə ödəməlidir.

Ağ Ev məsələ ilə bağlı hələlik açıqlama verməyib. İyul ayında o zamankı mətbuat katibi Karolin Livitt Peresin ödənişsiz məzuniyyətdə olduğunu və vəzifəsinə qayıtmayacağını bildirmişdi.

CFTC cümə günü açıqladığı razılaşmada Peresin Trampın çıxışları barədə əvvəlcədən əldə etdiyi məlumatlardan “etibar və məxfilik öhdəliyini pozaraq” mərc etmək üçün istifadə etdiyini və bununla bağlı məlumatları “mənimsədiyini” bildirib.

Qurum qeyd edib ki, Peresin araşdırma ilə “nümunəvi əməkdaşlığı” nəzərə alınaraq mülki cərimənin məbləği azaldılıb.

Peresə, həmçinin üç il müddətinə ticarət əməliyyatları aparmaq qadağan edilib.

“Kalşi”nin baş hüquq məsləhətçisi Bobbi DeNo bildirib ki, qərarı alqışlayırlar. O, “X” sosial şəbəkəsində yazıb: “Kim olmağınızın fərqi yoxdur: qaydalarımızı və ya federal qanunları pozsanız, nəticələri ilə üzləşəcəksiniz”.

Şirkət daha əvvəl BBC-yə bildirib ki, analitikləri mart ayında “qeyd bazarları”nda qeyri-adi mərc fəaliyyətləri aşkar ediblər. Bu müqavilələr çərçivəsində istifadəçilər çıxış edən şəxsin konkret ölkələrin adları, seçki kampaniyası şüarları və ya müəyyən sözlər kimi ifadələrdən istifadə edib-etməyəcəyinə dair proqnoz verirlər.

Şirkətin məlumatına görə, hesab məlumatlarının araşdırılması nəticəsində həmin istifadəçinin Ağ Evdə teleprompter operatoru kimi çalışan federal hökumət əməkdaşı olduğu müəyyənləşdirilib və bu fəaliyyət barədə tənzimləyici quruma məlumat verilib.

“Prezidentlər və Federal Ehtiyat Sisteminin sədrləri kimi siyasi liderlərin işlətdiyi sözlər valyuta bazarlarında, neft fyuçerslərində və fond bazarında milyardlarla dollarlıq hərəkətə səbəb olur”, – şirkət iyul ayında yaydığı açıqlamada bildirib.

Elə həmin ay Ağ Ev İdarəetmə Ofisi əməkdaşlara məktub göndərərək proqnoz bazarlarında mərc etməmələri barədə xəbərdarlıq edib. Bu barədə administrasiya rəsmiləri BBC-nin ABŞ-dakı media tərəfdaşı CBS News-a bildiriblər.

Aydın