Avropanın ən aktiv vulkanlarından birinin ətəyində yaşayan 6 yaşlı qız yeni açılan ibtidai məktəbin yeganə şagirdi olmağa hazırlaşır. İtaliyanın Stromboli adasında yerləşən kiçik balıqçı kəndi Cinostradakı Ayşa sentyabrın 10-dan etibarən nəhəng sinif otağında təkbaşına dərs keçəcək.

Qaynarinfo xəbər verir ki, Siciliyanın şimal sahillərində ucalan məşhur vulkanın dik yamaclarında yerləşən Cinostra o qədər təcrid olunmuş yaşayış məntəqəsidir ki, ada sakinləri buranı “adanın içində ada” adlandırırlar.

Strombolinin digər hissələri ilə quru yolu əlaqəsi olmayan kəndə yalnız qayıqlarla getmək mümkündür. Fırtınalı havalarda isə kəndlə əlaqə tamamilə kəsilir. Təxminən 40 nəfərin yaşadığı yaşayış məntəqəsindəki ibtidai məktəb əhalinin azalması səbəbindən 20 il əvvəl fəaliyyətini dayandırmışdı.

Ailəsi geri çəkilmədi, məktəb açıldı

Məktəbin yenidən fəaliyyətə başlaması Ayşanın ailəsinin qətiyyətli mövqeyi sayəsində mümkün olub. Ayşanın anası Monika və atası Raffa qızlarının təhsili üçün Eol adalarının ən böyüyü olan Lipariyə köçmək məcburiyyətində qalacaqlarını bildirərək yerli hakimiyyət orqanlarını hərəkətə keçiriblər.

Doğulub böyüdükləri yeri tərk etmək istəmədiklərini bildirən ailə Ayşanın da bu vəziyyətdən çox məmnun olduğunu deyib.

Ayşanın atası Raffa bildirib: “Biz bu kiçik cənnəti, təbiəti, dənizi və hətta evlərimizin üzərində ucalan vulkanı belə çox sevirik. Buradan ayrılmaq istəmirik. Qızımız yay aylarında bura gələn yaşıdları ilə vaxt keçirir, tətilə gələn alman qonşu uşaqlarından bir neçə alman sözü də öyrənib. O, çox xoşbəxt uşaqdır”.

Bir sinifdən ibarət məktəb yerli katolik kilsəsinə məxsus binada fəaliyyət göstərəcək və sentyabrın 10-da qapılarını açacaq.

Bələdiyyə sədri Rikardo Qullo məktəbin açılmasını “bu təcrid olunmuş icma üçün həmrəyliyin simvolu” adlandırıb. O, insanların uzaqda yaşamasından asılı olmayaraq təhsilin fundamental hüquq olduğunu vurğulayıb.

Kəndin keşişi Nino Pirotta isə məktəblərin yalnız təhsil məkanı olmadığını, eyni zamanda cəmiyyətin əsas toplaşma mərkəzlərindən biri olduğunu bildirib.

Ayşa bu vəziyyəti yaşayan yeganə uşaq deyil

Sinifdə təkbaşına təhsil alacaq uşaq yalnız Ayşa olmayacaq. Britaniyanın ən ucqar ibtidai məktəbi hesab edilən Şotlandiyadakı Out Skerris adasında yerləşən Skerris İcma Məktəbinin hazırda 20 yaşlarında olan keçmiş şagirdi Aron Anderson da bir müddət məktəbin yeganə şagirdi olub.

Əhalisi 70 nəfər olan adada Arona təhsil vermək üçün yerli hakimiyyət orqanlarının ildə təxminən 75 min funt sterlinq xərclədiyi açıqlanmışdı.

Stromboli kino dünyasının da diqqətindədir

Kino dünyasının da tez-tez diqqət mərkəzinə düşən Stromboli adasında 1950-ci ildə rejissor Roberto Rossellininin çəkdiyi və baş rolda İnqrid Berqmanın oynadığı klassik “Stromboli” filmi lentə alınıb.

Ada yaxın vaxtlarda Mik Caqqer, Dakota Conson və Coş O'Konnor kimi dünya şöhrətli aktyorların rol aldığı “Three Incestuous Sisters” filminin çəkilişləri ilə də yenidən gündəmə gəlib.

Bütün çətinliklərə baxmayaraq, Cinostrada açılan bu bir nəfərlik məktəb təhsilin istənilən şəraitdə davam etdirilməsi əzminin və yerli həyatı canlı saxlamaq səylərinin ruhlandırıcı nümunəsi kimi diqqət çəkir.

Aydın