İslandiyanın cənubundakı Reykyanes yarımadasında zəlzələdən sonra vulkan püskürməyə başlayıb.
Qaynarinfo bu barədə "Iceland Monitor"a istinadən xəbər verir.
Bildirilir ki, bu, yarımadada son 3 ildə 4-cü vulkan püskürməsidir.
Zəlzələ yerli vaxtla saat 21:00 radələrində (Bakı vaxtı ilə 01:00) başlayıb və maqnitudasının 4,2-yə çatdığı güman edilir. Sonra təxminən 22:46 (Bakı vaxtı ilə 02:46) Qrindavik şəhəri ərazisində vulkan püskürməsi başlayıb.
Bundan əvvəl İslandiya hakimiyyət orqanları əvvəlki zəlzələlər nəticəsində şəhərin altında toplana bilən lava təhlükəsi səbəbindən Qrindavikin boşaldılmasını elan etmişdi.
İslandiya bir neçə dağ-vulkanik sistemin mövcudluğuna görə əhəmiyyətli vulkanik fəaliyyətlə xarakterizə olunur. 2010-cu ildə Eyyafyatlayokudl vulakanın püskürməsi Qərbi Avropada hava nəqliyyatında problemlərə səbəb olub.
Qrindavikdən cəmi 7 kilometr və İslandiyanın paytaxtı Reykyavikdən təxminən 30 kilometr aralıda yerləşən Faqradalsfyal vulkanı əvvəllər 6 min il ərzində fəaliyyətsiz hesab olunurdu. Bir sıra zəlzələlərdən sonra 19 mart 2021-ci ildə püskürməyə başlayıb. Bundan sonra vulkan bir neçə dəfə - 2021-ci ilin sentyabrında, 2022-ci ilin avqustunda və 2023-cü ilin iyulunda yenidən püskürüb. Geoloqlar həmçinin Faqradalsfyal vulkanında Yerin dərinliklərindən qeyri-adi maqma aşkar ediblər.
Aydın
