Amerikalı alimlər onilliklərdir məlum olan kvant fiziki hadisəsinin real materiallarda fəaliyyət mexanizmini ilk dəfə yüksək dəqiqliklə hesablaya biliblər. Gələcəkdə yeni metod ifratkeçiricilərin və xüsusi xüsusiyyətlərə malik digər materialların hazırlanmasını sürətləndirə bilər.
Qaynarinfo xəbər verir ki, bu barədə “Index” nəşri yazır.
Kaliforniya Texnologiya İnstitutunun (Caltech) və Yel Universitetinin alimləri Kondo effektini araşdırıblar. Bu hadisə zamanı metallardakı maqnit atomları aşağı temperaturda elektrik müqavimətinin artmasına səbəb ola bilər.
“Bu hadisə 1930-cu illərdən məlum olsa da, onun nəticələrini dəqiq proqnozlaşdırmaq ciddi hesablama çətinlikləri yaradırdı. Tədqiqatçılar kvant fizikasının fundamental prinsiplərinə əsaslanan hesablamalardan istifadə edərək bəzi hallarda əvvəlki modellərlə müqayisədə 100 dəfə daha dəqiq nəticələr əldə ediblər”, – məqalədə qeyd olunur.
Yeni metod laboratoriya ölçmələri vasitəsilə də yoxlanılıb.
Kondo effektinin əsasını elektronlarla maqnit atomları arasındakı mürəkkəb qarşılıqlı təsirlər təşkil edir. Bu proseslərin dəqiq modelləşdirilməsi ən güclü kompüterlər üçün belə ciddi çətinlik yaradır.
Alimlər hesab edirlər ki, yeni metod indiyədək daha sadə materiallar üzərində sınaqdan keçirilsə də, gələcəkdə daha mürəkkəb kvant materiallarının tədqiqi üçün də yararlı ola bilər.
“Bu, elektrik şəbəkələrinin və yüksək məhsuldarlıqlı kompüterlərin iş prinsipini dəyişə biləcək ifratkeçiricilərin hazırlanmasında mühüm irəliləyişə çevrilə bilər”, – “Index” nəşri bildirir.
Aydın
