Mütəxəssislər həkim olmayan şəxslər tərəfindən edilən botoks tətbiqlərində istifadə olunan toksinlərin təhlükəli fəsadlara yol açdığını bildirərək, saxta botoksların yaratdığı risklərlə bağlı vacib xəbərdarlıq edirlər.

Qaynarinfo "CNN Türk"ə istinadən xəbər verir ki, dermatologiya üzrə mütəxəssis Məhəmməd Burak Yücelin sözlərinə görə, saxta məhsullarda və həkim nəzarəti olmadan edilən tətbiqlərdə gözlənilməyən vəziyyətlərlə tez-tez rastlaşmaq mümkündür:

"Bu, çox vacib mövzudur. Xüsusilə son dövrlərdə populyarlığı artan iki mövzu var: botoks və dolğu. Toksin tətbiqləri daha çox dinamik qırışıqlıqlar üçün, yəni hələ tam oturmamış xəttlərin azaldılması üçün istifadə olunur və bir növ dərinin gələcəyinə edilən investisiya kimi qiymətləndirilə bilər. Pasiyentlər adətən 18 yaşdan sonra bu prosedurlara tələbat göstərirlər. Göz ətrafında, alında və üzdə müəyyən əzələlərə inyeksiya edilərək onların fəaliyyətinin müəyyən müddətə dayandırılmasına və ya azaldılmasına yönəlmiş bu prosedurlara toksin tətbiqləri deyirik. Hazırda Türkiyədə istifadə üçün lisenziyalaşdırılmış 4 hüquqi toksin mövcuddur. Lakin tətbiq edənlərin və qeyri-rəsmi yerlərin artması ilə yanaşı, saxta məhsullar və saxta tətbiqçilər də xeyli çoxalıb. Bu səbəbdən xüsusilə diqqətli olmaq lazımdır. Burada əsas təhlükə odur ki, saxta toksinlərin tərkibində nə olduğunu bilmirik. Təsdiqlənmiş toksinlərdə doza, tətbiq sahələri və prosedurun qaydaları təcrübəli həkimlər tərəfindən dəqiq bilinir. Amma saxta məhsullarda tərkib naməlum olduğu üçün steril olub-olmadığı belə şübhə altındadır və nəticədə gözlənilməz fəsadlarla qarşılaşmaq ehtimalı olduqca yüksəkdir".

Yücel bildirib ki, saxta toksinlərlə bir neçə fərqli vəziyyət ortaya çıxa bilər:

"Ən az qorxulandan başlasaq, toksin heç bir təsir göstərməyə bilər. Yəni eyni dozanı, eyni əzələ qrupuna tətbiq etdiyimiz halda heç bir nəticə görməyə bilərik. Bu, ən yüngül yan təsirdir. Amma steril şəraitə riayət olunmadıqda tətbiq yerində infeksiyalar, hətta toxuma itkisinə qədər gedə bilən ağırlaşmalar görülə bilər.

Ən çox qorxduğumuz fəsad isə botulizm adlandırılan və xəstəni tənəffüs çatışmazlığı ilə reanimasiyaya qədər aparan ağır nəticələrdir. Son dövrlərdə bu hallara çox tez-tez rast gəlinir. Bunun əsas səbəbi həm həkim olmayan şəxslərin tətbiq sayının artması, həm də qeyri-qanuni məkanlarda saxta toksinlərin geniş istifadəsidir. Buna görə də həm həkim olmayan tətbiqçilərdən uzaq durmaq, həm də bazarın real qiymətləri ilə uyğun olmayan çox ucuz təkliflərə aldanmamaq ağırlaşmalardan qorunmaq üçün son dərəcə vacibdir".

Həkim bildirib ki, saxta toksinlə edilən botoks bəzən ölümə belə səbəb ola bilir:

"Bu tətbiqlər həqiqətən ölüm saçır. İnsan başına gəlmədikcə dərk etmir. Heç kim üçün arzulamırıq, amma tətbiqdən 2-3 həftə sonra bulanıq görmə, ikili görmə ilə başlayan şikayətlər nitq pozuntusu, udqunma çətinliyi və son mərhələdə tənəffüs çatışmazlığına qədər gedə bilər. Xəstə reanimasiyaya düşə, həftələrlə ağır müalicə ala bilər. Toksinin bədəndən təmizlənməsi belə ayrıca bir müalicə tələb edir. Buna görə də mütləq qeyd etmək lazımdır: saxta botoks həqiqətən ölüm saçır. Bu tətbiqləri yalnız etibarlı, nüfuzlu qurumlarda və təcrübəli mütəxəssislər tərəfindən etdirmək böyük fayda gətirir".

Aydın