ABŞ-da 2028-ci ildə keçiriləcək prezident seçkiləri ilə bağlı siyasi müzakirələr intensivləşib. Respublikaçılar Partiyasında Donald Trampdan sonrakı dövrün mümkün namizədləri gündəmə gələrkən, Demokratlar Partiyasında da seçkiyə qatılması ehtimal olunan siyasətçilərin adları açıqlanıb.
Qaynarinfo xəbər verir ki, İstanbul Aydın Universitetinin müəllimi Yeliz Albayrakın qiymətləndirməsinə görə, respublikaçılar arasında vitse-prezident Cey Di Vens hazırda mümkün namizədlər sırasında ön plana çıxır. Onun fikrincə, Vens Trampın siyasətindən narazı olan mühafizəkar seçicilərin dəstəyini qazana bilər.
Albayrak xatırladıb ki, Vens İranla bağlı hərbi əməliyyatlara və İsraillə əməkdaşlığa Tramp və Marko Rubiodan daha məsafəli yanaşıb. Ekspertin sözlərinə görə, Vens böhranların ilk mərhələsindən etibarən bu siyasəti dəstəkləməyib.
Respublikaçılar arasında mümkün namizədlərdən biri də ABŞ dövlət katibi Marko Rubiodur. Bununla yanaşı, Florida qubernatoru Ron DeSantis, sabiq vitse-prezident Mayk Pens və keçmiş dövlət katibi Mayk Pompeonun da adları çəkilir. Lakin Albayrak onların Vens qarşısında ciddi alternativə çevrilməsinin çətin olduğunu düşünür.
Demokratlarda Harris, Nyusom və Şapiro gündəmdədir
Demokratlar Partiyasında isə üç siyasətçinin adı daha çox müzakirə olunur. Bunlar sabiq vitse-prezident Kamala Harris, Kaliforniya qubernatoru Qevin Nyusom və Pensilvaniya qubernatoru Coş Şapirodur.
Ekspert Kamala Harrisin yenidən prezidentliyə namizəd ola biləcəyini istisna etmir. Onun fikrincə, Harris hələ də partiya daxilində populyarlığını qoruyur. Nyusom isə Tramp administrasiyasına qarşı sərt mövqeyi ilə diqqət çəkir. Şapiro da mümkün namizədlər sırasında yer alır.
Albayrak hesab edir ki, hər iki partiyada seçicilərin dəyişiklik tələbi yeni simaların ortaya çıxmasına səbəb ola bilər. Buna görə də 2028-ci il seçkilərinə yaxın keçiriləcək sorğular namizədlərin mövqelərini daha aydın göstərəcək.
Beləliklə, Trampın prezidentlik dövründən sonrakı siyasi mənzərənin necə formalaşacağı və hər iki partiyanın hansı namizədlə seçicilərin qarşısına çıxacağı ABŞ siyasətinin əsas müzakirə mövzularından birinə çevrilib.
Aydın
