"Bölgələrdə istirahət zonaları ilə bağlı qiymətlər hazırda tələb və təkliflə tənzimlənir".
Bunu Qaynarinfo-ya açıqlamasında turizm eksperti Ceyhun Aşurov deyib.
Ekspertin sözlərinə görə, bu sahədə rəqabət mühitinin daha da şəffaflaşması üçün əlverişli qiymət və daha keyfiyyətli xidmət təklif edilməlidir:
"Bu da otellərin qiymət siyasətinə, eyni zamanda turistlərin xeyrinə təsirini göstərəcək. Xüsusən regionlarda 2-4 ulduzlu otellərin sayı artarsa, daha əlverişli qiymət əldə olunacaq".
Ekspert vurğulayıb ki, yay ən çox insanların istirahət etdiyi mövsümdür:
"Bu gün bölgələrdəki otellərlə bağlı deyilən qiymətlər realdır. Hazırda mövsümlə bağlı qiymətlərin mövsümə uyğun şəkildə artdığı görünür.
Bəzi otellərdə 200-300, bəzilərində isə 100 manat ətrafındadır. Burada bir sevindirici hal var ki, ildən-ilə regionlarda qonaq evləri, apartmanlar, kənd evlərinin sayı artır. Bunlar da qiymətləri yumşaldır".
Ceyhun Aşurov əvvəlki illərdə qiymətlərin indiki ilə müqayisədə daha baha olduğunu xatırladıb:
"Amma son bir və iki ildə qiymətlər artmır, əvvəlki kimi qalıb. Bəlkə də cüzi enmə var".
Qeyd edək ki, bu yay üçün bölgələrdəki otellərin qiyməti açıqlanıb.
Valyuta.az-ın məlumatına görə, ayrı-ayrı istirahət bölgələrində iki nəfər üçün qiymətlər 80-395 manat arasında dəyişir.
Bahar Rüstəmli
