Yatmazdan əvvəl corab geyinmək yuxunun keyfiyyətinə müsbət təsir göstərə bilər. Mütəxəssislər bildirirlər ki, ayaqların isti saxlanması insanın daha tez yuxuya getməsinə, gecə ərzində daha rahat yatmasına kömək edir. Lakin bunun üçün corab seçiminə və istifadə qaydalarına diqqət yetirmək lazımdır.
Qaynarinfo xəbər verir ki, bu barədə "Blikk" nəşri yazıb.
Mütəxəssislərin sözlərinə görə, ayaqların isinməsi orqanizmin temperatur tənzimləmə mexanizminə təsir edir. Ayaqlar isti olduqda bədən artıq istiliyi daha asan xaric edir və nəticədə daxili temperatur bir qədər aşağı düşür. Bu proses isə orqanizmə yuxuya hazırlaşmaq siqnalı verir.
Yuxu üzrə mütəxəssis Monika Maturun sözlərinə görə, aparılan araşdırmalar ayaqlarını gecə isti saxlayan insanların daha tez yuxuya getdiyini və yuxu keyfiyyətinin yaxşılaşdığını göstərir.
Bu üsul xüsusilə menopauzaya keçid dövründə olan qadınlar üçün faydalı ola bilər. Hormonal dəyişikliklər nəticəsində yaranan qəfil istilik basmaları və gecə tərləmələri yuxu rejimini poza bilər. Mütəxəssislər hesab edirlər ki, ayaqların mülayim şəkildə isidilməsi bədəndə artıq istiliyin xaric olunmasını asanlaşdıraraq bu narahatlıqların təsirini azalda bilər.
Corabla yatmağın başqa bir üstünlüyü isə daban dərisinin quruması və çatlamasının qarşısını almağa kömək etməsidir. Bunun üçün yatmazdan əvvəl ayaqlara nəmləndirici krem çəkmək, daha sonra təmiz və yumşaq corab geyinmək tövsiyə olunur. Bu üsul dəridə nəmin qorunmasına şərait yaradır.
Bəs yatarkən hansı corablardan istifadə etmək lazımdır?
Mütəxəssislər gecə üçün pambıq kimi hava keçirən, nəmi yaxşı ötürən materiallardan hazırlanmış, boş və rahat corabları məsləhət görürlər. Elastik hissəsi ayağı sıxmamalı, dəridə iz buraxmamalıdır. Həmçinin corabın ölçüsü düzgün seçilməli və hər gecə təmiz, quru corab geyinilməlidir.
Bununla belə, hər kəs üçün corabla yatmaq uyğun seçim deyil. Xüsusilə ayaqları çox tərləyən insanlar diqqətli olmalıdırlar. Havanı zəif keçirən materiallar dəridə nəmin toplanmasına, qıcıqlanmaya və narahatlığa səbəb ola bilər. Həddindən artıq dar corablar isə qan dövranına mənfi təsir göstərə bilər.
Mütəxəssislər vurğulayırlar ki, corabla yatmaq məcburi deyil. Əgər bu, insanda narahatlıq yaradırsa, ayaqları açıq saxlamaq daha məqsədəuyğundur. Əsas məsələ yuxu zamanı bədənin rahatlığını təmin etmək və ayaqların həddindən artıq isinməsinə yol verməməkdir.
Aydın
