
Alma tərkibindəki vitaminlər, liflər və bitki mənşəli birləşmələr sayəsində sağlam qidalanmanın vacib hissəsi hesab olunur. Araşdırmalar göstərir ki, bu meyvənin müntəzəm istehlakı xolesterin səviyyəsinə, qan dövranına, iltihabi proseslərə və hətta saçların böyüməsinə müsbət təsir göstərə bilər.
Qaynarinfo "Unian"a istinadən xəbər verir ki, alimlər almada olan pektin, polifenollar, ursol turşusu və prosianidin B2 kimi maddələrin orqanizmə təsirini araşdırıblar.
1. Xolesterinin səviyyəsini aşağı sala bilər
Almanın həm qabığında, həm də lətində pektin adlı qida lifi mövcuddur. Bu maddə orqanizmdən öd turşularının xaric olunmasına kömək edir. Qaraciyər isə həmin turşuların ehtiyatını bərpa etmək üçün qanda olan LDL – "pis" xolesterindən istifadə edir. Nəticədə xolesterinin səviyyəsi azala bilər.
2. Qan dövranını yaxşılaşdırır
Almanın tərkibindəki polifenollar, xüsusilə flavonoidlər damar sağlamlığına müsbət təsir göstərə bilər. Bu maddələr azot oksidinin istehsalını artıraraq damarların genişlənməsinə və divarlarının elastikliyinin qorunmasına kömək edir.
3. Əzələ toxumasının qorunmasına kömək edə bilər
Alma qabığında olan ursol turşusu alimlərin diqqətini çəkən birləşmələrdəndir. Araşdırmalarda bu maddənin əzələ toxumasının qorunması və zədələnmələrdən sonra bərpası ilə mümkün əlaqəsi öyrənilir.
4. İltihabi proseslərə təsir göstərə bilər
Almada olan absisik turşusu qan şəkərinin tənzimlənməsi, immun sisteminin fəaliyyəti və iltihabi proseslərlə əlaqəli araşdırılır. Bu maddənin orqanizmdəki bəzi bioloji mexanizmlərə təsiri hələ də öyrənilir.
5. Saçların qalınlaşmasına kömək edə bilər
Almanın tərkibindəki prosianidin B2 birləşməsi saçların böyüməsinə mümkün təsiri ilə diqqət çəkir. Alimlər bu maddənin saç follikullarının hüceyrələrinə təsirini, saçların böyümə mərhələsini uzatmaq və keratin istehsalını dəstəkləmək imkanlarını araşdırırlar.
Bu xüsusiyyətlərin saçların qalınlığına və sıxlığına müsbət təsir göstərə biləcəyi ehtimal olunur. Lakin alma yeməyin saç tökülməsini müalicə etdiyi və ya saçları mütləq qalınlaşdırdığı sübut edilməyib.
6. Beyni yaşlanma ilə bağlı dəyişikliklərdən qoruya bilər
Almanın tərkibindəki bəzi bitki birləşmələrinin sinir hüceyrələrinin qorunmasına təsiri də tədqiqat mövzusudur. Xüsusilə bu maddələrin bağırsaq mikroflorası ilə qarşılıqlı əlaqəsi və həzm sistemi ilə beyin arasındakı əlaqəyə təsiri öyrənilir.
7. Diş sağlamlığına faydalı ola bilər
Polifenollarla zəngin qidaların diş minasının zədələnməsinin azalmasına mümkün təsiri də alimlər tərəfindən araşdırılır. Bununla belə, alma diş fırçalamağı və ağız boşluğuna gündəlik qulluğu əvəz etmir.
Mütəxəssislər almanın balanslaşdırılmış qidalanmanın bir hissəsi kimi istehlakını tövsiyə edirlər. Bununla yanaşı, onun hər hansı xəstəliyin müalicəsi üçün dərman vasitəsi olmadığını və araşdırılan faydaların hamısının insanlar üzərində klinik olaraq təsdiqlənmədiyini nəzərə almaq vacibdir.
Aydın