Futbol dünyasının Yaxın Şərqə yolunu açan Səudiyyə Ərəbistanı son illərdə futbolçuların illik qazanclarının əhəmiyyətli dərəcədə artmasını təmin edib.

Qaynarinfo xəbər verir ki, Anadolu Agentliynin 2024-cü ilin idmanda diqqət çəkən mövzularla bağlı hazırladığı xəbərdə ilin ən çox qazanan futbolçuları müzakirə edilib.

"Forbes"in siyahısına görə, Səudiyyə Ərəbistanının "Əl-Nəsr" klubunda çıxış edən portuqaliyalı ulduz Kriştiano Ronaldo 285 milyon dollar gəlirlə 2024-cü ilin ən çox qazanan futbolçuları siyahısında birinci olub.

Səudiyyə Ərəbistanında çıxış edən 4 futbolçu 2024-cü ilin ən çox qazanan 10 futbolçusu sırasında yer alıb. Siyahıda İngiltərədən 3, İspaniyadan 2 və ABŞ-dan bir futbolçu yer alıb.

Kriştiano Ronaldo - 285 milyon dollar

2024-cü ildə Ronaldo siyahıdakı ən yaxın rəqibi argentinalı Lionel Messinin qazancından iki dəfə çox qazanıb. Keçən il 260 milyon dollarlıq illik qazancı ilə özünün rekordunu qıran 39 yaşlı futbolçu bu il gəlirini 285 milyon dollara yüksəldib.

Avqust ayında "YouTube" kanalı açaraq onlayn varlığını artıran Ronaldonun bütün sosial media platformalarında 1 milyarda yaxın izləyicisi olub. Başda "Nike" olmaqla brend ortaqlıqları, həmçinin otel və geyim sahələrindəki təşəbbüsləri ilə meydandan kənar gəliri ildə 65 milyon dollara yüksələn Ronaldo bir il ərzində "Əl-Nəsr"dən 220 milyon dollar qazanıb.

Lionel Messi - 135 milyon dollar

Argentinalı ulduz Lionel Messi 2024-cü ildəki 135 milyon dollarlıq gəliri ilə siyahının ikinci pilləsində qərarlaşıb.

"Adidas", "Apple TV" və "Konami" kimi brendlərlə əməkdaşlıqları sayəsində 75 milyon dollar qazanan Messi meydandan kənar gəlirdə liderdir.

"Instagram"da 500 milyondan çox izləyicisi və öz prodüser şirkəti olan 37 yaşlı Messi oynadığı ABŞ-ın "İnter Mayami" klubundan illik 60 milyon dollar maaş alıb.

Neymar - 110 milyon dollar

Braziliyalı ulduz Neymar Səudiyyə Ərəbistanındakı karyerası gözlənildiyi kimi getməsə də, meydanda və meydandan kənarda qazandığı gəlirlə ilin üçüncü ən çox qazanan futbolçusu oldu.

Keçən il dizindən aldığı zədə səbəbindən meydandan uzaq olan 32 yaşlı oyunçu "Puma" kimi markalarla əməkdaşlığa davam edib və sosial media vasitəsilə xeyli gəlir əldə edib.

"Əl Hilal"dan 80 milyon dollar alan Neymar 2024-cü ildə meydandan kənarda 30 milyon gəlirlə 110 milyon dollara çatıb.

Kərim Benzema - 104 milyon dollar

Kərim Benzema 2024-cü ilin ən çox qazanan futbolçuları siyahısında 4-cü yeri tutub.

Benzema 2023-cü ildə astronomik məbləğ qarşılığında karyerasını Səudiyyə Ərəbistanında davam etdirməyə qərar verən ulduzlardan biri olub.

"Əl İttihad"dan 100 milyon dollar maaş alan 36 yaşlı Benzema meydandan kənar gəlirləri ilə qazancını 104 milyon dollara yüksəldib.

Kilian Mbappe - 90 milyon dollar

Kilian Mbappe bu il "Real Madrid"ə keçərək "uşaqlıq arzusunu" reallaşdırıb.

"Nike" və "Dior"un da olduğu ortaqlıqlar sayəsində 20 milyon dollar qazanan 25 yaşlı futbolçunun qazancı futboldan qazandığı 70 milyonu əlavə etdikdə 90 milyon dollara yüksəlib.

Ən çox qazananlar siyahısında 5-ci yerdə olan Mbappenin gedişi Fransa liqasına da şok yaşadıb. Ulduz futbolçuların gedişi ilə əlaqədar Fransa liqasının illik yayım gəliri 1,1 milyard dollardan 700 milyon dollara düşüb.

2024-cü ildə futbol dünyasında ən çox qazanan 10 ad aşağıdakılardır:

1. Kriştiano Ronaldo (Əl-Nəsr) - 285 milyon dollar

2. Lionel Messi (İnter Mayami) - 135 milyon dollar

3. Neymar (Əl Hilal) - 110 milyon dollar

4. Kərim Benzema (Əl İttihad) - 104 milyon dollar

5. Kilian Mbappe (Real Madrid) - 90 milyon dollar

6. Erlinq Haaland (Mançester Siti) - 60 milyon dollar

7. Vinisius Junior (Real Madrid) - 55 milyon dollar

8. Məhəmməd Salah (Liverpul) - 53 milyon dollar

9. Sadio Mane (Əl-Nəsr) - 52 milyon dollar

10. Kevin De Bruyne (Mançester Siti) - 39 milyon dollar

Aydın