Payız aylarında Avropanın böyük hissəsi ağac yarpaqlarının yaşıl rəngdən sarı, narıncı və ya tünd qırmızı çalarlara keçməsi ilə parlaq rənglərə bürünür. Bir çox turist bu mənzərələri görmək və yadda saxlamaq üçün səyahət edir. Bu dövrdə əzəmətli qalalar və qədim küçələr xüsusilə təsirli görünür.

Qaynarinfo xəbər verir ki, “Travel Off Path” portalının baş redaktoru və təcrübəli səyyah Tayler Foksun yazdığına görə, onun ABŞ-dakı doğma ştatında oktyabrın sonlarında payız rənglərini izləmək üçün adətən cəmi iki həftəlik qeyri-sabit dövr olur. Daha sonra qəfil fırtına yarpaqları budaqlardan tökür və soyuq qış yağışları başlayır. Lakin Avropada vəziyyət tamamilə fərqlidir.

“Unikal coğrafiyası – Alp dağlarında böyük yüksəklik fərqləri, dərin çay vadiləri və geniş boreal meşələri sayəsində – harada axtarmaq lazım olduğunu dəqiq bilsəniz, payız sehrini bir neçə aya qədər uzatmaq mümkündür”, – Foks qeyd edir.

Avropada payız yarpaqlarını izləmək üçün 10 məkan

1. Bavariya Alpları, Almaniya – İlk sarı yarpaqlar yüksək dağlıq ərazilərdə hələ sentyabrda görünür. Aşağı yüksəkliklərdə isə “qızılı payız” noyabr ayına qədər davam edir.

2. Bled gölü, Sloveniya – Burada zəngin qırmızı və narıncı çalarlar oktyabrın sonuna, hətta noyabrın əvvəlinə qədər qorunur.

3. Transilvaniya, Rumıniya – Karpat dağlarının sıx və geniş meşə örtüyü yüksəklikdən asılı olaraq bir neçə həftə ərzində tədricən rəngini dəyişir.

4. Dolomitlər, İtaliya – Adi yarpaqlı ağaclar burada nisbətən erkən yarpaqlarını töksə də, bölgədəki iynəyarpaqlı qaraşam ağacları oktyabrın sonunda parlaq qızılı rəngə boyanır və noyabrda güclü qar yağanadək bu görünüşünü qoruyur.

5. Engadin vadisi, İsveçrə – Unikal mikroiqlim və sıx qaraşam meşələri sayəsində bu ərazidə parlaq sarı rənglər bir neçə həftə ərzində qalır. Bu müddət ölkənin digər bölgələrindəki yarpaqlı meşələrdən daha uzundur.

6. Şotlandiya dağlıq əraziləri, Birləşmiş Krallıq – Burada əslində “ikiqat payız” müşahidə olunur. Əvvəlcə yay sonu və payızın əvvəlində çöllük ərazilərdəki xəzəlotu tünd, doymuş bənövşəyi rəng alır. Daha sonra onu noyabr ayına qədər rəngini qoruyan qızılı ağcaqayın və palıd ağacları əvəz edir.

7. Plitviçe gölləri Milli Parkı, Xorvatiya – Parkdakı göllər müxtəlif yüksəkliklərdə terrasvari yerləşdiyindən sıx fıstıq və palıd meşələri yuxarı göllərdən aşağı kanyona doğru tədricən rəngini dəyişir. Bu da payız mövsümünü xeyli uzadır.

8. Laplandiya, Finlandiya – Ölkənin uzaq şimalında “qızılı payız” sentyabrın əvvəlində başlayır və yavaş-yavaş cənuba doğru irəliləyir. Bu, turistlərə ölkə boyunca hərəkət etdikcə rənglərin dəyişməsini bir aydan çox müddətdə izləmək imkanı verir.

9. Zalskammerqut (Hallstatt), Avstriya – Bölgədəki nəhəng Alp gölləri yerli temperaturu yumşaldır, erkən güclü şaxtaların qarşısını alır. Bunun sayəsində geniş fıstıq meşələri oktyabrın sonlarına qədər sıx və yaşıl görünüşünü qoruyur.

10. Douro vadisi, Portuqaliya – Burada yarpaqlı ağacların əvəzinə kilometrlərlə uzanan terraslı üzüm bağları üstünlük təşkil edir. Məhsul yığımından sonra onlar al-qırmızı, narıncı və sarı rənglərə boyanır və bu parlaq çalarları noyabrın sonlarına qədər qoruyur.