Ukrayna tərəfindən ələ keçirilən Şimali Koreya hərbçilərindən biri əvvəlcə intihar etməyə cəhd edib, sonra isə Koreya romantik filmlərinə baxmağı tələb edib.

Qaynarinfo xəbər verir ki, bu barədə onu əsir götürən Ukrayna desant qüvvələri məlumat verib.

"Döyüş zamanı artıq yaralanmışdı, amma təxliyə maşını gələnə qədər nisbətən sakitləşmişdi, - 95-ci hücum briqadasının əsgəri bildirib. Ukrayna Hava-Desant Qüvvələrinin mətbuat xidməti tərəfindən dərc olunan müsahibədə deyilir: - Biz onu yolla aparırdıq, yaxınlıqda beton sütunlar vardı. O, qəfildən qaçaraq başını bir sütuna çırpdı”.

Şimali Koreya keçən ilin avqustunda Ukraynanın gözlənilməz hücumundan sonra Rusiyanın Kursk bölgəsində Ukrayna qoşunlarını çıxarmaq üçün təxminən 12000 əsgər göndərib.

Şimali Koreya əsgərləri döyüş meydanında oktyabrın sonunda görünüblər. Ukraynalı hərbçilər onların əsir düşməkdənsə özlərini öldürməyi üstün tutduqları üçün ağır bir reputasiya qazandıqlarını bildirirlər.

Ukrayna Prezidenti Volodimir Zelenski bildirib ki, müharibə başladığından bəri Şimali Koreyanın 4000 əsgəri ya həlak olub, ya da yaralanıb.

Yanvarın 11-də Ukrayna qüvvələri iki Şimali Koreya hərbçisini sağ əsir götürüb. Onlar müalicə və dindirilmə üçün Seulun casus təşkilatlarının köməyi ilə Kiyevə aparılıb.

Nə Kreml, nə də Pxenyan müharibədə Şimali Koreyanın iştirakını təsdiq edib. Ukrayna isə Rusiyanın şimali koreyalı ölənlərin üzlərini tanınmaz hala gətirmək üçün yandırılmasını tapşırdığını bildirib.

Əsir düşən iki şimali koreyalı Ukrayna üçün böyük təbliğat vasitəsi sayıla bilər. Videolarda əsirlər Rusiyaya təlim üçün göndərildiklərini, lakin daha sonra döyüşlərdə iştirak etməyə məcbur edildiklərini bildiriblər. Onlara saxta Rusiya hərbi şəxsiyyət vəsiqələri verilibmiş.

Əsiri ələ keçirən Ukrayna desant qoşunlarının əsgərləri hərbçini bir səngərdə, döyüş uğursuzluğundan sonra yaralı vəziyyətdə tapdıqlarını qeyd edib. "Onun başı və bir qolu yaralanmışdı. Üstündə qumbara, bıçaq və sosiska vardı. Mən ondan hər şeyi atmasını istədim, amma sosiskanı yemək olduğu üçün vermək istəmədi. Biz də qoyduq qalsın”, - əsgər deyib.

İntihara cəhd edən şimali koreyalı başqa bir birliyə təhvil verilib.

"O sakitləşdi. Digər əsgərlər yaralarını sarıyıb ona yemək verdilər. Bir müddət sonra isə Koreya dilində romantik filmlərə baxmaq istədiyini dedi”, - desant qüvvələrinin əsgəri əlavə edib.

Alpər