Aralıq dənizi regionu yay istirahəti üçün Avropanın ən populyar istiqamətlərindən biridir və mövsüm zamanı burada böyük turist axını müşahidə olunur. Bununla belə, Cənubi Avropada hələ də izdihamdan uzaq, rahat atmosferə malik, möhtəşəm çimərlikləri və heyrətamiz memarlığı ilə seçilən şəhərlər qalır. Bu şəhərlərdə dar küçələrdə sıxlıqla qarşılaşmadan və ya restoranda masa uğrunda mübarizə aparmadan sakit sahil mühitindən zövq almaq mümkündür.

Qaynarinfo xəbər verir ki, "Traveloffpath" portalı yay tətili üçün uyğun olan, az tanınan 5 Aralıq dənizi şəhərini təqdim edib.

Kartaxena, İspaniya

Kartaxena çimərlik istirahəti ilə qədim dünya cazibəsinin ideal vəhdətidir. Şəhərin Roma dövrünə aid abidələri "UNESCO" siyahısına daxil edilib və regionda ən yaxşı qorunan nümunələrdən sayılır. Qiymətlər isə "Barseloneta" ilə müqayisədə daha münasibdir.

Ən maraqlı məkanlar arasında eramızdan əvvəl I əsrə aid qədim teatr və Roma freskaları və mozaikaları ilə bəzədilmiş "Kasa-de-la-Fortuna" villası var.

Region firuzəyi suları ilə məşhur olmasa da, qayalar arasında gizlənmiş "Kala Kortina" buxtası sakit və kristal təmiz suyu ilə seçilir və burada turistlər daha azdır.

Ayaçço, Korsika (Fransa)

Korsika adasının paytaxtı Ayaçço dağlıq ərazilərlə Aralıq dənizi arasında yerləşir və əsasən Napoleon Bonapartın doğulduğu yer kimi tanınır. Onun uşaqlıq evi hazırda muzey kimi fəaliyyət göstərir. Həmçinin Napoleonun xaç suyuna salındığı Ayaçço kilsəsini ziyarət etmək tövsiyə olunur.

Yaxınlıqda yerləşən XVI əsrə aid Sitadel qismən hərbi məqsədlərlə istifadə olunur. Sahilboyu ərazi isə gün batımında möhtəşəm mənzərələr təqdim edir. Şəhərin mərkəzində yerləşən Sen-Fransua çimərliyi sakit istirahət üçün uyğundur.

Retimno, Krit (Yunanıstan)

Krit adasında turistlərin standart marşrutlarına tez-tez daxil edilməsə də, Retimno ən gözəl mənzərələrdən birini təqdim edir. Burada Venesiya dövrünə aid malikanələr, keçmiş Osmanlı məscidləri və dar küçələr diqqət çəkir.

Retimno qalasından şəhərin damları və Egey dənizinə panoramik baxış açılır. Venesiya limanı ətrafında rəngarəng qayıqları seyr etmək və sahil tavernalarında dəniz məhsullarının dadına baxmaq mümkündür.

Yaxınlıqda yerləşən Preveli çimərliyi adanın ən unikal məkanlarından biridir. Burada palma ağacları ilə əhatələnmiş çay dənizə tökülür.

Taranto, İtaliya

Taranto Apuliya regionunun daha sakit və autentik hissəsində yerləşir. Bura sosial şəbəkələrdə məşhur olan turistik məkandan çox, "köhnə İtaliya"nı xatırladır.

Şəhərdə köhnə saraylar, ailəvi restoranlarla əhatələnmiş sakit küçələr, binalar arasında asılmış paltar ipləri və real italyan həyatının izləri görünür.

Taranto qədim dövrdə Sparta koloniyası kimi qurulub. Burada qədim yunan məbədlərinin qalıqları ilə yanaşı, ölkənin ən zəngin kolleksiyalarından birinə sahib arxeoloji muzey fəaliyyət göstərir. Gün batımında limandakı Araqon qalasını və məşhur "Ponte Jirevole" körpüsünü ziyarət etmək tövsiyə olunur.

Piran, Sloveniya

Sloveniyanın da Aralıq dənizi sahili var. Cəmi 45 kilometr uzunluğunda olsa da, bu sahil zolağı Venesiya üslubu və özünəməxsus cazibəsi ilə seçilir. Bu şəhərlərdən biri Sloveniya Rivyerasının incisi sayılan Pirandır.

Piran Xorvatiyanın Adriatik sahillərini xatırladır, lakin daha kompakt, sakit və az turistlidir. Şəhər piyada gəzintilər üçün ideal şərait yaradır.

Şəhərin mərkəzində yerləşən Tartini meydanı əsas başlanğıc nöqtəsi hesab olunur. Təpənin zirvəsində yerləşən Müqəddəs Georgi kilsəsi və onun zəng qülləsi Piranın ən tanınmış abidəsidir. Buradan Triyest körfəzinə və aydın havada İtaliyaya qədər mənzərə açılır.

Aydın