Maqnezium orqanizmin normal fəaliyyəti üçün vacib minerallardan biridir. Bununla belə, bir çox insan bu elementi qida vasitəsilə kifayət qədər qəbul etmir. Diyetoloqlar maqneziumun ilk növbədə qida məhsullarından alınmasını tövsiyə edirlər, çünki bu yolla orqanizm digər faydalı maddələri də qəbul edir.

Qaynarinfo xəbər verir ki, "Prevention” nəşrinin yazdığına görə, dietoloq Jaklin London bildirib ki, maqnezium əzələlərin yığılması, sinir sisteminin normal fəaliyyəti, sümüklərin sağlamlığının qorunması, enerji mübadiləsi, qanda şəkərin səviyyəsinin və arterial təzyiqin tənzimlənməsi, həmçinin su-elektrolit balansının saxlanılması üçün vacibdir.

Onun sözlərinə görə, maqneziumu qida məhsullarından almaq əlavələrdən istifadə ilə müqayisədə daha məqsədəuyğundur. Çünki bu məhsullar orqanizmi eyni zamanda lif, zülal, sağlam yağlar və antioksidantlarla da təmin edir.

Tərkibində maqnezium yüksək olan 12 qida:

Balqabaq tumu — 28 qramında 156 mq maqnezium var. Maqneziumun ən zəngin mənbələrindən biridir və salatlara, şorbalara, eləcə də xəmir məmulatlarına əlavə edilə bilər.

İspanaq — 1 stəkan bişmiş ispanaqda 157 mq maqnezium var. Yarpaqlı yaşıl tərəvəzlər maqneziumun ən yaxşı mənbələrindən hesab olunur.

Çia toxumu — 28 qramında 95 mq maqnezium var. Tərkibində həmçinin omeqa-3 yağ turşuları, lif və tam dəyərli bitki mənşəli zülal mövcuddur.

Badam — 28 qramında 76,5 mq maqnezium var. Həmçinin sağlam yağlar və zülalla zəngindir.

Tünd şokolad (70–85 faiz kakao) — 28 qramında 65 mq maqnezium var. Kakao faizi nə qədər yüksəkdirsə, şəkərin miqdarı bir o qədər az, faydası isə daha çox olur.

Qara lobya — yarım stəkan bişmiş məhsulda 60 mq maqnezium var. Həmçinin lif və bitki mənşəli zülal baxımından zəngindir.

Soya südü — 1 stəkanında 51 mq maqnezium var. Maqnezium tofu və edamamedə də mövcuddur.

Avokado — orta ölçülü bir meyvədə 39 mq maqnezium var. Sağlam yağların mühüm mənbələrindən biridir.

Banan — bir ədədində 32 mq maqnezium var. Tərkibində həmçinin kalium və C vitamini mövcuddur.

Qəhvəyi düyü — yarım stəkan bişmiş məhsulda 30 mq maqnezium var. Digər tam taxıl məhsulları da bu mineralın yaxşı mənbələridir.

Yoqurt — 1 stəkan təbii yoqurtda 30 mq maqnezium var.

Qızılbalıq — 85 qramında 25 mq maqnezium var. Tərkibində ürək sağlamlığı üçün faydalı olan omeqa-3 yağ turşuları da mövcuddur.

Gündə nə qədər maqnezium lazımdır?

Diyetoloqların sözlərinə görə, böyüklərin gündəlik maqnezium tələbatı 310–420 mq arasında dəyişir. Dəqiq norma yaşdan, cinsdən, hamiləlik və südvermə dövründən asılıdır.

Mütəxəssislər qeyd edirlər ki, ciddi maqnezium çatışmazlığı nisbətən nadir hallarda müşahidə olunur. Bunun səbəbi orqanizmin bu mineralı sümüklərdə və yumşaq toxumalarda toplamaq qabiliyyətinə malik olması, həmçinin qandakı maqnezium səviyyəsinin böyrəklər tərəfindən ciddi şəkildə tənzimlənməsidir. Buna görə də adi qan analizi maqnezium çatışmazlığını hər zaman aşkar etmir.

Aydın