Kiyevdə Rusiya Federasiyası ilə Qərb ölkələri arasında böyük girov mübadiləsinə təşvişlə baxırlar, qorxurlar ki, bu, Ukraynadan xəbərsiz gizli danışıqların aysberqinin yalnız görünən hissəsi ola bilər.

Qaynarinfo xəbər verir ki, bu barədə "Washington Post" (WP) yazıb.

Nəşr qeyd edir ki, bu mübadilə birbaşa Ukraynaya aid deyil, Ukrayna rəsmiləri orada birbaşa iştirak etməyib və ictimaiyyətə açıqlama verməyiblər. Lakin mübadilənin miqyası, mürəkkəbliyi, məxfiliyi və əhəmiyyəti diqqətdən qaçmayıb.

Cümə günü Kremlin sözçüsü Dmitri Peskov məhbusların dəyişdirilməsi sazişinin Ukraynada müharibəyə son qoymaq üçün danışıqlara gətirib çıxara biləcəyi ilə bağlı istənilən təklifi tez bir zamanda rədd edib. Lakin WP qeyd edib ki, Kiyev uzun müddətdir ABŞ-ın belə bir sülhün mümkünlüyü barədə Moskva ilə gizli danışıqlara başlaya biləcəyindən qorxur.

Ukrayna Prezidenti Aparatının müşaviri Mixaylo Podolyak nəşrə verdiyi şərhdə Ukraynanın indi istənilən potensial danışıqlar zamanı yan keçmək və atəşkəs şərtlərini tətbiq etmək üçün "çox müstəqil" olduğuna inandığını bildirib.

"Bununla belə, ukraynalılar anlayırlar ki, onların ölkəsi xaricdən gətirilən və bağışlanan silah və pul hesabına sağ qalır", deyən WP əlavə edir ki, əgər bu həyat xətlərindən hər hansı biri kəsilsə, Ukrayna böyük bəlaya düçar olacaq.

Bu səbəbdən, Moskva və Vaşinqton arasında aylarla davam edən zəhmətli və mürəkkəb diplomatik danışıqların nəticəsi olan məhbus sövdələşməsi ilə bağlı xəbərlər bəzi ukraynalıları narahat edir.

Kiyev meri Vitali Kliçko deyib: "Bunun trendə çevrilməyəcəyi qorxusu var".

WP qeyd edir ki, ukraynalılar artıq bu cür məcburiyyətlə bağlı mənfi tarixi təcrübəyə malikdirlər.

"10 il əvvəl Rusiya ilə münaqişə başlayanda Fransa və Almaniya liderləri Fransua Olland və Angela Merkel prezident Pyotr Poroşenkonu Minsk razılaşmaları kimi tanınan atəşkəs sazişini çox əlverişsiz şərtlərlə imzalamağa sövq etdilər", deyə WP yazıb.

Qeyd edək ki, Türkiyədə Rusiya Federasiyası ilə Qərb ölkələri arasında məhbus mübadiləsi baş tutub. Rusiya amerikalı jurnalistlər Evan Gerşkoviç və Alsa Kurmaşevanı ABŞ-a ekstradisiya edib. Bir neçə rusiyalı müxalifətçi də həbsdən azad edilərək deportasiya olunub. Əvəzində Rusiya Avropada həbsdə olan casusları və muzdlu qatilləri, o cümlədən Almaniyada çeçen müxalifətçini öldürən qatil Vadim Krasikovu geri alıb.

Azad edildikdən sonra rus müxalifətçilərinin ilk işi Qərbi Rusiyaya qarşı sanksiyaları yumşaltmağa çağırmaq olub. Onun fikrincə, bu cür sanksiyalar "ədalətsiz və əks-məhsuldardır".

Aydın