İnsanın gündəlik yerimə sürəti onun ümumi sağlamlıq vəziyyətini və uzunmüddətli ölüm riskini qiymətləndirmək üçün mühüm göstərici ola bilər. Yeni araşdırma göstərib ki, daha sürətli yeriyən insanlarda ölüm riski nisbətən aşağı olur. Bununla belə, alimlər sürətli yerimənin birbaşa ömrü uzatdığını iddia etmirlər.
Qaynarinfo xəbər verir ki, bu barədə Ziare.com nəşri məlumat yayıb.
“JAMA Network Open” jurnalında dərc olunan tədqiqatda Böyük Britaniyada yaşayan 4067 nəfər iştirak edib. İştirakçıların orta yaşı təxminən 69 olub. Araşdırma zamanı onların adi tempdə yerimə sürəti ölçülüb, həmçinin doqquz gün ərzində biləklərinə taxılan xüsusi cihaz vasitəsilə gündəlik hərəkət göstəriciləri qeydə alınıb.
Təxminən 12 il davam edən müşahidələr nəticəsində müəyyən edilib ki, həm sınaq zamanı, həm də gündəlik həyatda daha sürətli yeriyən şəxslərdə ölüm riski aşağıdır. Tədqiqatçılar digər sağlamlıq və həyat tərzi amillərini nəzərə aldıqdan sonra da bu əlaqənin mövcud olduğunu bildiriblər.
Geriatrik fizioterapiya üzrə mütəxəssis Bet Templin yerimə sürətini orqanizmin ümumi fəaliyyətini əks etdirən mühüm göstəricilərdən biri adlandırıb. Onun sözlərinə görə, sürətli və rahat yerimək üçün güclü ayaq əzələləri, sağlam ürək və ağciyərlər, yaxşı tarazlıq, eləcə də sinir sisteminin normal fəaliyyəti vacibdir.
Ekspert qeyd edib ki, yerimə sürətinin azalması bəzən sağlamlıq problemlərinin ilkin əlaməti ola bilər. Bu dəyişikliklər hətta bəzi hallarda laborator analizlərdə hər hansı pozuntu aşkarlanmamışdan əvvəl müşahidə edilə bilər.
Bununla belə, mütəxəssislər araşdırmanın nəticələrinin düzgün şərh edilməsinin vacibliyini vurğulayırlar. Belə ki, sürətli yerimə ilə ölüm riskinin azalması arasında əlaqənin müəyyən edilməsi birincinin birbaşa ömrü uzatdığını sübut etmir. Digər tərəfdən, gündəlik yerimə tempini ölçmək üçün istifadə olunan ağıllı saat və fitnes bilərziklərində hələ vahid standart metod mövcud deyil.
Aydın
