50 yaşdan sonra qadınların qidalanmasına xüsusi diqqət yetirməsi vacibdir. Mütəxəssislər antioksidantlar, lif və omeqa-3 yağ turşuları ilə zəngin olan beş məhsulun orqanizmdə iltihabın azalmasına, sümük və ürək sağlamlığının qorunmasına kömək etdiyini bildirirlər.
Qaynarinfo xəbər verir ki, bu barədə “EatingWell” nəşrində dərc olunan məqalədə dietoloqların tövsiyələri yer alıb.
1. Giləmeyvələr
Qaragilə, böyürtkən, çiyələk və moruq antioksidantlarla zəngindir. Bu maddələr iltihabla mübarizəyə və yaş artdıqca beyin fəaliyyətinin qorunmasına dəstək ola bilər.
2. Paxlalılar
Lobya, mərcimək və noxud lif və bitki mənşəli zülal mənbəyidir. Onlar bağırsaq mikrobiomunun sağlamlığını dəstəkləyir, həzmi yaxşılaşdırmağa və yaşla əlaqədar əzələ kütləsinin azalmasının qarşısını almağa kömək edə bilər. Xüsusilə menopauza dövründə liflə zəngin qidaların qəbulu əhəmiyyətlidir.
3. Tünd yaşıl yarpaqlı tərəvəzlər
İspanaq, kələm və digər tünd yaşıl yarpaqlı tərəvəzlər orqanizmi iltihab və oksidləşdirici stresslə mübarizədə dəstəkləyən faydalı maddələrlə zəngindir. Onların tərkibindəki kalsium, maqnezium və kalium isə sümük sağlamlığının qorunması baxımından əhəmiyyətlidir.
4. Qızılbalıq
Qızılbalıq omeqa-3 yağ turşuları, keyfiyyətli zülal və D vitamini ilə zəngindir. Dietoloqlar həftədə bir-iki porsiya yağlı balıq yeməyin ürək sağlamlığını dəstəkləyə, oynaqlardakı sərtliyin azalmasına və beyin funksiyalarının qorunmasına kömək edə biləcəyini bildirirlər. Bu balıq həm də əzələ kütləsinin və sümük möhkəmliyinin saxlanması üçün faydalıdır.
5. Çərəzlər
Badam, qoz və digər çərəzlər antioksidantlar, faydalı yağlar, lif və minerallarla zəngindir. Onların müntəzəm və ölçülü istehlakı ürək-damar sağlamlığını dəstəkləyə bilər. Araşdırmalara görə, badam və qoz iltihab göstəricilərinin azalmasına, Braziliya qozu isə oksidləşdirici stresslə mübarizəyə kömək edə bilər.
Mütəxəssislərin fikrincə, bu məhsulların gündəlik qidalanmaya daxil edilməsi yaşla bağlı bəzi sağlamlıq risklərinin azaldılmasına dəstək ola bilər. Bununla belə, balanslı qidalanma, fiziki aktivlik və fərdi sağlamlıq ehtiyacları da nəzərə alınmalıdır.
Aydın
