Bir çox ölkə mövsümlər dəyişdikcə gündəlik həyatı və əmək fəaliyyətini tənzimləmək məqsədilə saatları irəli və ya geri çəkir. Lakin bir ölkə yay vaxtına keçiddən imtina edib.
Qaynarinfo xəbər verir ki, bu barədə "Wiadomości" yazıb.
Avropa İttifaqında saatların mövsümi dəyişdirilməsinin ləğvi ilə bağlı müzakirələr 2018-ci ildən davam edir. Həmin il Avropa Komissiyası yay və qış vaxtına keçidin dayandırılmasını təklif edib. İctimai məsləhətləşmələr bu təşəbbüsün geniş dəstək qazandığını göstərib.
Planın həyata keçirilməsi üçün mümkün tarix kimi 2021-ci il göstərilsə də, təşəbbüs reallaşmayıb. Avropa İttifaqına üzv ölkələr vahid mövqeyə gələ bilməyib və layihə qanunvericilik müzakirələri mərhələsində qalıb. Nəticədə, Aİ ölkələrinin əksəriyyətində saatlar əvvəlki kimi ildə iki dəfə dəyişdirilir. Lakin bütün ölkələrdə belə deyil.
İslandiya saatları nə vaxt dəyişdirməyi dayandırıb?
İslandiya bir neçə onillik əvvəl yay və qış vaxtına mövsümi keçiddən imtina edib. Ölkədə saatlar sonuncu dəfə 1968-ci il aprelin 7-də dəyişdirilib və bir saat irəli çəkilib. Həmin vaxtdan bəri İslandiyada ilboyu sabit vaxt tətbiq olunur.
Yay vaxtına keçid olmadığı üçün ölkədə “qış” və “yay” vaxtı arasında fərq yaranmır. Qışda İslandiyada saat Polşadakından bir saat geri, yayda isə iki saat geri olur.
İslandiyada mövsümi vaxt dəyişiklikləri ilk dəfə 1917-ci ildə tətbiq edilib. Daha sonra bu sistem 1939–1967-ci illərdə yenidən qüvvədə olub. 1968-ci ildə İslandiya parlamenti ilboyu Qrinviç vaxtından — GMT (UTC+0) istifadə etmək qərarına gəlib.
Nəşr həmçinin xatırladır ki, İslandiyanın coğrafi mövqeyinə görə qışda gündüzlər çox qısa, yayda isə günəşli saatlar xeyli uzun olur. Gün işığının müddəti mövsümlərə görə dəyişsə də, İslandiyalılar saatları dəyişdirmədən yaşamağa üstünlük verirlər. Buna görə də ölkədə vaxt bütün il ərzində sabit qalır.
Aydın
