Bu gün telefonları, qulaqlıqları və digər elektron cihazları bir-birinə bağlayan Bluetooth texnologiyasının adı heç də təsadüfi seçilməyib. Simsiz rabitə texnologiyası adını X əsrdə yaşamış Danimarka kralı Harald Bluetoothdan götürüb.
Qaynarinfo xəbər verir ki, bu adın texnologiya ilə əlaqələndirilməsi Intel mühəndisi Cim Kardaxın ideyası olub. "Bluetooth Special Interest Group"un (Bluetooth SIG) rəsmi məlumatına görə, əvvəlcə layihə üçün müvəqqəti kod adı kimi nəzərdə tutulan “Bluetooth” sonradan daimi ada çevrilib.
Tarixi söhbət texnologiyanın adına çevrildi
Kardax bu ideyanın yaranmasını "Ericsson" şirkətinin mühəndisi Sven Mattissonla söhbəti ilə əlaqələndirir. İki mütəxəssis qısa məsafəli simsiz rabitə texnologiyaları üzərində müzakirə apararkən Skandinaviya tarixi də söhbətə daxil olub.
Mattissonun danışdığı vikinqlərlə bağlı hekayələr və Kardaxın sonradan apardığı araşdırmalar Danimarka kralı Harald Bluetoothun adını gündəmə gətirib. Kralın müxtəlif qüvvələri birləşdirməsi ideyası fərqli şirkətlərin məhsullarını vahid simsiz rabitə standartında bir araya gətirmək məqsədi ilə uyğunlaşdırılıb.
Beləliklə, əsrlər əvvəl yaşamış hökmdarın ləqəbi yeni texnologiyanın adına çevrilib.
Başqa adlar da nəzərdən keçirilmişdi
Bluetooth SIG-in məlumatına əsasən, texnologiya üçün “RadioWire” və “PAN” adları da təklif olunmuşdu. PAN ingiliscə “Personal Area Networking” ifadəsinin qısaltması idi. Lakin internetdə bu adla bağlı çoxsaylı nəticələrin olması onun seçilməsini çətinləşdirib.
“RadioWire” variantı üçün tələb olunan genişmiqyaslı ticarət nişanı araşdırması isə vaxtında başa çatmayıb. Nəticədə müvəqqəti ad kimi istifadə edilən “Bluetooth” saxlanılıb və zamanla bütün dünyada tanınıb.
Maraqlıdır ki, texnologiyanın tarixi ilə bağlılıq yalnız adında deyil, loqosunda da əksini tapıb. Bluetooth simvolu Haraldın ad və ləqəbinin baş hərflərini ifadə edən iki qədim runik işarənin birləşməsindən yaradılıb.
Beləliklə, gündəlik istifadə etdiyimiz bu simvol həm müasir texnologiyanın inkişaf tarixini, həm də min ildən çox əvvəl yaşamış vikinqlər kralını xatırladır.
Aydın
