Bir çox insan reysə qeydiyyat zamanı keçid tərəfdə yer əldə etməyi uğur hesab edir. Lakin kifayət qədər yüksək məbləğ ödəməklə təyyarədə ikinəfərlik çarpayı, isti duş, hətta üç otaqdan ibarət şəxsi apartament əldə etmək mümkündür.
Qaynarinfo xəbər verir ki, bu barədə “TimeOut” nəşri yazır.
Səyahət sahəsində konsaltinq xidmətləri göstərən “AirAdvisor” aviaşirkətlərin təklif etdiyi xidmətləri beş kateqoriya üzrə 100 ballıq şkala ilə qiymətləndirib. Bunlara dəbdəbə səviyyəsi, unikallıq, məxfilik və eksklüzivlik, xidmətdən yararlanmağın çətinliyi, eləcə də təklifin adi təyyarə oturacağının imkanlarını nə dərəcədə üstələməsi daxildir.
Reytinqə şəxsi təyyarələr, artıq təqdim olunmayan xidmətlər və geniş ictimaiyyət üçün hələ əlçatan olmayan təkliflər daxil edilməyib. Biznes-klassın salonlara giriş, səyahət aksesuarları dəstləri və uzanaraq yatmağa imkan verən oturacaqlar kimi standart üstünlükləri də nəzərə alınmayıb. Hər aviaşirkətdən siyahıya ən çoxu iki təklif daxil edilib.
Reytinqdə ilk yeri “Etihad Airways” aviaşirkətinin “The Residence” xidməti tutub. Bu xidmət 100 baldan 98 bal toplayıb. “Airbus A380” təyyarəsinin göyərtəsində yerləşən bu apartamentdən iki sərnişin istifadə edə bilər. Buraya qonaq otağı, ikinəfərlik çarpayısı olan yataq otağı və duş kabinəsi ilə təchiz edilmiş vanna otağı daxildir.
Dəbdəbəli xidmətlər sərnişinlər evdən çıxmazdan əvvəl başlayır. Onlara evdə və ya oteldə reysə qeydiyyatdan keçmək, sürücülü avtomobillə transfer və hava limanında fərdi qarşılama təklif olunur. “AirAdvisor” bu xidməti dəbdəbə, unikallıq, məxfilik və adi təyyarə oturacağı ilə müqayisədə üstünlüklər baxımından demək olar ki, maksimum qiymətləndirib.
İkinci yerdə “Emirates” aviaşirkətinin “Airbus A380” təyyarəsində təqdim etdiyi “Shower Spa” xidməti qərarlaşıb. Bu təklif 91 bal toplayıb. Birinci sinif sərnişinləri uçuş zamanı təyyarənin yuxarı göyərtəsinin ön hissəsində yerləşən iki duş otağından birində duş qəbul edə bilərlər. Otaqlarda paltar dəyişmək üçün sahə, güzgülü kosmetik masa və qızdırılan döşəmə var. Uzun uçuşdan sonra təyyarədən təravətli görünüşlə enmək imkanı sərnişinlər üçün cəlbedici üstünlükdür.
Üçüncü yeri İsveçrənin “SWISS” aviaşirkətinin “First Grand Suite” xidməti tutub. 88 bal toplayan bu təklif ilk üçlükdə yer alan yeganə Avropa məhsuludur.
Xidmət birinci sinifdə yerləşən iki qonşu lüks nömrəni və onların arasındakı keçid sahəsini birləşdirərək tam məxfi məkan yaradır. Aviaşirkət bu məkanı “göydə loft” adlandırır. Üç nəfərədək sərnişin üçün nəzərdə tutulan sahədən yataq otağı, ofis və ya görüş otağı kimi istifadə etmək mümkündür. Beləliklə, sərnişinlər standart salon sahəsi ilə məhdudlaşmadan dincələ, işləyə və birlikdə səyahət edə bilərlər.
Dördüncü yerdə təyyarənin göyərtəsində deyil, hava limanında təqdim olunan xidmət qərarlaşıb. “Air France” aviaşirkətinin “La Première” birinci sinif sərnişinləri Paris Şarl-de-Qoll hava limanında təxminən 45 kvadratmetr sahəsi olan şəxsi lüks nömrə sifariş edə bilərlər. Burada ikinəfərlik çarpayısı olan yataq otağı, vanna otağı, açıq terras və “Sisley” spa mərkəzinə giriş imkanı mövcuddur. Xidmət 85 bal toplayıb.
Beşinci yeri “Singapore Airlines” aviaşirkətinin “Airbus A380” təyyarələrindəki lüks nömrələri tutub. 82 balla qiymətləndirilən bu nömrələrin hər birində ayrıca oturacaq və çarpayı var. Bundan əlavə, cütlüklər üçün qonşu nömrələri birləşdirərək vahid ikinəfərlik çarpayı yaratmaq mümkündür.
2026-cı ildə “AirAdvisor” şirkətinin versiyasına görə, dünyanın ən dəbdəbəli uçuş təcrübələrinin ilk onluğu belədir:
1. “Etihad Airways” — “The Residence”: 98 bal.
2. “Emirates” — “Airbus A380” təyyarəsində “Shower Spa”: 91 bal.
3. “SWISS” — “First Grand Suite”: 88 bal.
4. “Air France” — hava limanında “La Première” şəxsi lüks nömrəsi: 85 bal.
5. “Singapore Airlines” — “Airbus A380” təyyarəsində lüks nömrələr: 82 bal.
6. “Lufthansa” — “Allegris First Class Suite Plus”: 80 bal.
7. “Japan Airlines” — “Airbus A350-1000” təyyarəsində birinci sinif: 78 bal.
8. “Emirates” — “Airbus A380” təyyarəsində bort salonu: 76 bal.
9. “Qatar Airways” — “Al Safwa” birinci sinif salonu: 72 bal.
10. “Virgin Atlantic” — “Retreat Suite”: 68 bal.
Aydın
