Vətəndaş bir bankdan neçə kart ala biləcək? - Ekspert açıqladı

Azərbaycan Banklar Assosiasiyası (ABA) İctimai Birliyi ödəniş kartlarının və elektron pula bağlı ödəniş hesablarının sayına tətbiq edilən risk əsaslı yanaşma ilə bağlı açıqlama yayıb.

Assosiasiyanın qəbul etdiyi yanaşmaya əsasən, əməkhaqqı, pensiya və digər sosial müavinətlər üçün nəzərdə tutulmuş ödəniş kartları, sahibkarlıq hesabına bağlı ödəniş kartları, habelə depozit hesablarına bağlı ödəniş kartları istisna olmaqla, hər bir bankda bir məhsul üzrə bir ödəniş kartının təqdim edilməsi nəzərdə tutulur.

Mövzu ilə bağlı bank eksperti İsmayıl Məmmədov Qaynarinfo-ya açıqlamasında bildirib ki, yeni yanaşma eyni səviyyəli kartların bir bankdan çoxsaylı şəkildə əldə edilməsinin qarşısını almağa yönəlib:

“Məsələ bundan ibarətdir ki, hər bir şəxs istənilən bankda, hər valyuta üzrə – dollar, avro, manat – eyni səviyyəli kartdan bir ədəd əldə edə bilər. Yəni siz manatda bir ədəd Infinity kart ala bilərsiniz, bir ədəd Gold, bir ədəd Platinum və bir ədəd klassik kart ala bilərsiniz. Lakin bunlardan ikincisini almağa məhdudiyyət qoyulur”.

Ekspertin sözlərinə görə, müştəri eyni kartdan ikinci dəfə əldə etmək istəyərsə, başqa banka müraciət edə bilər:

“Əgər siz ikinci belə bir kart istəyirsinizsə, o zaman digər banka müraciət etməli olacaqsınız. Yəni burada bir bankda eyni kartdan iki ədəd alınmasının qarşısını almaq məqsədi güdülür. Bu, bank nəzarətinin və Mərkəzi Bankın kartların xaotik şəkildə buraxılmasının qarşısını alması üçün atılan addımdır. Maliyyə nəzarətinin gücləndirilməsinə hesablanmış bir tədbirdir”.

İsmayıl Məmmədov əməkhaqqı, pensiya və digər sosial ödəniş kartlarının bu məhdudiyyətdən istisna təşkil etdiyini deyib:

Ekspert rəqəmsal kartların isə bu baxımdan ayrıca imkan yaratdığını vurğulayıb:

“Yeni yaradılan rəqəmsal kartlar var. Onlardan həm qeydiyyatdan keçmək üçün istifadə edirsiniz, məsələn, orada az miqdarda pul saxlayırsınız, həm də rəqəmsal kartlardan istifadə etməklə rahat şəkildə ödənişlər həyata keçirirsiniz. Bu baxımdan ödənişlərlə bağlı problem yaşanmayacaq”.

İsmayıl Məmmədovun sözlərinə görə, məhdudiyyət kartlardan ümumiyyətlə istifadə imkanını deyil, eyni məhsul üzrə çoxsaylı kartların əldə edilməsini əhatə edir. Ekspert hesab edir ki, yeni yanaşma vətəndaşın kart seçimlərini əhəmiyyətli dərəcədə məhdudlaşdırmır:

“Bu məsələdə hüquqlarımız, seçimlərimiz pozulmurmu? Əslində burada tələb-təklif məsələsi var. Yəni banklar əgər müəyyən kartı təklif etmirsə, bu, onların seçimidir. Təklif etmirsə, biz də həmin kartı əldə edə bilməyəcəyik”.

İsmayıl Məmmədov bildirib ki, müştərilərin müxtəlif banklardan fərqli kartlar əldə etmək imkanları kifayət qədər genişdir:

“Sadəcə olaraq, Mərkəzi Bank bununla bağlı məhdudiyyət qoyur. Yəni bu, o deməkdir ki, biz həmin kartdan istədiyimiz qədər əldə edə bilmərik. Kifayət qədər bank olacaq. 19 bank olacaq, çünki biri digər bankla - Respublika Bankla AccessBank birləşir. Ona görə də 20 yox, 19 bank olacaq.

19 bankın hər birindən Visa və Mastercard olmaqla müxtəlif kart növlərini götürsək, hər bankdan, demək olar ki, beş-altı kart əldə etmək mümkün olacaq. Hər bankdan bir rəqəmsal kart da götürə bilərik. Hər valyutada istəsək, onu da valyutaların sayına – deyək ki, avro, manat və dollar – vursaq, yeddi kartı üçə vuranda 21 kart edir. Yəni bu, kifayət qədər çoxdur”.

Ekspert sonda bildirib ki, yeni yanaşma əsasən eyni səviyyəli kartların çoxsaylı şəkildə əldə edilməsini məhdudlaşdırır:

Günay İlqarqızı