Serbiyanın keçmiş prezidenti Aleksandar Vuçiçin parlament seçkilərindən sonra hakimiyyəti güc yolu ilə qoruyub saxlamağı düşündüyü, lakin yüksək səviyyəli telefon danışıqlarından sonra bu ssenaridən geri çəkildiyi iddia edilir.
Qaynarinfo xəbər verir ki, bu barədə “The Times” nəşri mənbələrinə istinadən məlumat yayıb.
Nəşrin yazdığına görə, antiterror polis bölməsinin komandiri Spasoye Vuleviç oktyabrın 25-də səsvermə günü Belqradın mərkəzinə 4 min polis əməkdaşının və onun “quldurlar” adlandırdığı daha 3 min nəfərin göndərildiyini bildirib. Vuleviçin iddiasına əsasən, Vuçiç seçkilərin nəticələrini tanımamaq niyyətində olub.
Bununla belə, keçmiş prezidentin nümayəndəsi bu iddiaları rədd edib. O bildirib ki, polis qüvvələrinin cəlb olunması mümkün iğtişaşlar təhlükəsinə cavab idi və hakimiyyəti zorla ələ keçirmək planları ilə əlaqəsi olmayıb.
“The Times” Avropa Parlamentinin üzvü Sandro Qozinin də seçki günü Vuçiçin güc ssenarisinə hazırlaşdığı barədə məlumatlar aldığını yazıb. “Tələbə siyahısı” hərəkatının nümayəndəsi Radomir Sayiçiç isə seçkilərdə fərqin az olacağı təqdirdə nəticələrin güc tətbiq etməklə dəyişdirilməsi planının mövcud olduğunu iddia edib.
Vuleviçin sözlərinə görə, Vuçiçə Avropa hökumətlərinin nümayəndələri zəng edərək onu belə addımdan çəkindirməyə çalışıblar. Qozinin fikrincə isə telefon danışıqlarının Vuçiçin mövqeyinə təsir göstərməsi versiyası inandırıcı deyil.
Məqalədə oktyabrın 25-də Serbiyada keçirilən parlament seçkilərində Vuçiçin dəstəklədiyi siyasi qüvvənin müxalifətdəki “Tələbə siyahısı” hərəkatına məğlub olduğu bildirilir. Bununla belə, hakimiyyətin güc yolu ilə saxlanılması ilə bağlı iddialar müstəqil şəkildə təsdiqlənməyib.
Aydın
