Səhər yeməyində yumurta, avokado və kəsmiyin birləşdirilməsi gün ərzində aclıq hissini nəzarətdə saxlamağa kömək edə bilər. Mütəxəssislər bu məhsulların zülal, faydalı yağlar və liflə zəngin olduğunu bildirirlər.
Qaynarinfo xəbər verir ki, İtaliyalı diyetoloq Sara Bassi uzun müddət toxluq hissi yaradan səhər yeməyi üçün sadə resept təklif edib. Onun hazırladığı menyuya qaynadılmış yumurta, avokado, kəsmik, qızardılmış çörək və meyvələr daxildir.
Reseptə əsasən, əvvəlcə iki ədəd bərk qaynadılmış yumurta əzilərək avokado ilə qarışdırılır. Daha sonra qarışığa kəsmik, bir qədər duz və zeytun yağı əlavə edilir. Hazır kütlə qızardılmış çörəyin üzərinə çəkilir, yemək isə meyvələrlə tamamlanır.
Yumurtanın toxluq hissinə təsiri
“Nutrients” elmi jurnalında dərc olunan araşdırmada yumurta və yulaf sıyığından ibarət iki fərqli səhər yeməyinin təsiri müqayisə edilib. Dörd həftə davam edən tədqiqatda 50 sağlam yetkin iştirak edib. Hər iki menyunun enerji dəyəri 340 kilokalori olub.
Nəticələr göstərib ki, yumurta yeyən iştirakçılar gün ərzində toxluq hissini daha yaxşı qoruyublar. Bu qrupda aclıqla əlaqəli hormon olan qrelinin səviyyəsində də əhəmiyyətli azalma qeydə alınıb.
Tədqiqat zamanı hər iki səhər yeməyinin ürək-damar sağlamlığı baxımından təhlükəsiz olduğu, LDL və HDL xolesterin göstəricilərinin nisbətində isə ciddi dəyişiklik yaranmadığı bildirilib.
Avokado bağırsaq sağlamlığına da faydalıdır
Reseptin digər əsas komponenti olan avokado lif və mono doymamış yağlarla zəngindir. İllinoys Universitetinin 12 həftəlik araşdırmasında artıq çəkisi və ya piylənməsi olan 25-45 yaş arası 163 sağlam yetkinin qidalanması izlənilib.
Avokado qəbul edən iştirakçılarda lifin parçalanmasında iştirak edən bağırsaq mikroorqanizmlərinin sayının və müxtəlifliyinin artdığı müşahidə olunub. Həmçinin bağırsaq sağlamlığı ilə əlaqəli bəzi metabolitlərdə dəyişikliklər qeydə alınıb.
Məqalədə qeyd olunur ki, orta ölçülü bir avokado təxminən 12 qram qida lifi ehtiva edir. Yetkinlər üçün tövsiyə olunan gündəlik lif miqdarı isə 28-34 qram arasında dəyişir.
Beləliklə, yumurta və kəsmikdən alınan zülal, avokadonun tərkibindəki faydalı yağlar, çörək və meyvələrdəki digər qida maddələri birlikdə balanslı səhər yeməyi yaradır. Bu kombinasiya gündəlik menyunu zənginləşdirməklə yanaşı, toxluq hissinin qorunmasına da kömək edə bilər.
Aydın
